“ ဝန်ခံပါသည် ”

တနေ့က ...
ယဉ်ယဉ်ဟု သူ့ကိုယ်သူခေါ်သော၊ ကျနော် တစ်ခါမှ မမြင်ဘူးသော ကောင်းမလေး တစ်ယောက်က စိတ်မီးအိမ်ကို ဝင်လည်ပြီး .. ကျွန်တော့်ကို မေးပါသည် ... “ ဒီစာတွေက ကိုခိုင်မြဲရေးတာတွေလားတဲ့” ..။
“ ဟုတ်လည်းဟုတ်တယ်.. မဟုတ်လည်း မဟုတ်ဘူး ” လို့ ပြန်ဖြေလိုက်ပါသည်.။

အမှန်လည်း ဤအတိုင်းပင်ဖြစ်ပါ သည်။ ရှင်းပြပါမည်..။ ကျွန်ုပ်၏ ဝါသနာတစ်ခုမှာ စာအုပ်တစ်အုပ်ကို ကြိုက်မိပြီဆိုလျှင် .. အကြိမ်ပေါင်းများစွား ဖတ်လေ့ရှိပါသည်..။ ကျွန်တော့် အကြိုက်ဆုံးစာအုပ်များထဲတွင်
ဆရာ မောင်ပေါ်ထွန်း ဘာသာပြန်ထားရေသားထားသော.. “ စိတ်တည်ငြိမ်မှု စိတ်ချမ်းသာမှူနှင့် ဘ၀အောင်မြင်မှူ” ဆိုသော စာအုပ်မှာ ရှေ့ဆုံးမှပါဝင်ပါသည်.။ မူရင်း အင်္ဂလိပ်စာအုပ် အမည်မှာ "Calm" ဟူ၍ဖြစ်သည်။ နှစ်လက်မ ပတ်လည် အိတ်ဆောင်စာအုပ်လေးဟု ဆိုပါသည်..။ ထိုစာအုပ်ကို ကြိုက်လွန်းသဖြင့် သုံးအုပ်ဝယ်ပြီး နှစ်အုပ်ကို သူငယ်ချင်းနှစ်ယောက်ကို လက်ဆောင် ပေးခဲ့ပါသည်..။ ကျန်တစ်အုပ်ကိုတော့ အိပ်ယာဘေးမှာ ထားပြီး ညအိပ်ယာဝင်တိုင်း ဖတ်သည်..။ မနက်အိပ်ယာထ အိပ်ယာထဲမှာပင် ဖတ်သည်..။ သည်လိုနှင့် စာတွေလည်း အလွတ်နီးပါ ရလာပြီး .. နောက်ပိုင်း စာအုပ်ကို သွားလေရာ သယ်သွားရင်း နှင့် ဘယ်နေရာတွင်မေ့ကျန်မိခဲ့မှန်း မသိတော့ပေ ..။ စိတ်မကောင်းစရာပင် .။
သွားတိုင်း သယ်သည်ဆိုသည်မှာ ညအိပ်ခရီးကို ဆိုလိုပါသည်..။
ဤစာအုပ်ကို စာအုပ်ဆိုင်တွေရောက်တိုင်း ပြန်ရှာနေသည်မှာ တစ်နှစ်ကျော်ခဲ့ပါပြီ ..။ အသစ်ပြန်မထွက်တော့ပေ..။

သို့သော် ..
စာအုပ်ပျောက်သွားသော်လည်း .. စာများကို ပြန်လည် အမှတ်ရနေဆဲပင်..။ ထို့ကြောင့် စိတ်မီးအိမ်မှာ မူလစာအုပ်အမည်အတိုင်း “စိတ်တည်ငြိမ်မှု စိတ်ချမ်းသာမှူနှင့် ဘ၀အောင်မြင်မှူ” ဟူ၍ပြန်လည်ဖေါ်ပြပါသည်..။
“လက်ပတ်နာရီကို ရောင်းပစ်လိုက်ပါ၊”၊ “ဖိနပ်ချွတ်ထားပါ” နှင့် “ချစ်တင်းနှောပါ” စသော စာသားများမှာ မူလအတိုင်း မှတ်မိသမျှ ပြန်လည် ဖေါ်ပြပါသည်.။ ထို့ကြောင့် .. “ဟုတ်လည်းဟုတ်တယ်” ဟု ပြောရခြင်းဖြစ်သည်..။ “ မဟုတ်လည်း မဟုတ်ဘူး” ဆိုသည်မှာ .. “ငှက်လိုကျင့်ပါ”၊ “ဖြေးဖြေးလျှောက်ပါ” နှင့် “စနစ်တကျရှုပ်ပါ” စသည်တို့မှာ ကိုယ်တိုင်ကြုံတွေ့ရသည်တို့မှ ရေးသားထားခြင်းဖြစ်သောကြောင့်ပင်..။


ခိုင်မြဲ

မှတ်ချက်။ ။ အကယ်၍များ စာဖတ်သူမိတ်ဆွေ တစ်နေရာရာတွင် မောင်ပေါ်ထွန်း၏ “ စိတ်တည်ငြိမ်မှု စိတ်ချမ်းသာမှူနှင့် ဘ၀အောင်မြင်မှူ ” စာအုပ်ကို တွေ့ရှိခဲ့ပါက ... ကျွနိုပ်အား တစ်အုပ်လောက် လက်ဆောင်ပေးပါရန် .. မေတ္တာရပ်ခံအပ်ပါသည်..။ ကျေးဇူး အထူးတင်ပါမည် ..။

[+/-] အပြည့်အစုံသို့...

[+/-] မိတ်ဆက်စာသာ...